బార్లు..బార్లా..!

• 24గంటల మద్యం అమ్మకాలు
• మామూళ్ల మత్తులో అధికారగణం

రాష్ట్రంలో బార్ల నిర్వాహకులు విచ్చలవిడి అమ్మకాలకు తెగబడుతున్నారు. అధికారుల కనుసన్నల్లోనే బార్లలో 24గంటల పాటు మద్యం అమ్మకాలు జరుగుతున్నాయి. ముఖ్యంగా హైదరాబాద్ పాతబస్తీలో ఇది మరింత శృతిమించి రాగానపడిందని చెప్పొచ్చు. నిర్థేశిత సమయం మించిన తర్వాత అధిక రేట్లకు మద్యం విక్రయాలు జరుగుతున్నా.. ఎక్సైజు, స్పెషల్‌ ఎన్‌ఫోర్స్‌మెంట్‌ ఊసేలేదు. ఎవరైనా అదేమని ప్రశ్నిస్తే.. నిజమా? మా దృష్టికి రాలేదే? అంటూ… అమాయకపు చూపులు చూడటం అధికారులకు పరిపాటిగా మారింది. ఒకరిద్దరు అధికారులైతే బెల్టు షాపుల కట్టడి కోసమే వదిలేస్తున్నామంటూ అతితెలివి సమాధానం చెపుతున్నారు. బార్లలో నిరంతర విక్రయాలకు కొందరు రాజకీయ పార్టీల నేతలు కూడా సహకరిస్తున్నారు. యధేచ్చగా అమ్మకాలు చేస్తూ ప్రభుత్వ నిర్ణయానికి భారీగా గండికొడుతున్నారు. ప్రభుత్వ లక్ష్యాలను చేరుకోవడంలో నిరంతరం పని చేయాల్సిన స్థానిక ఎక్సైజు అధికారులు మామూళ్ల మత్తులో జోగుతున్నారనే విమర్శలు వినబడుతున్నాయి.

నిబంధనలు బేఖాతర్‌..

ప్రభుత్వ నిబంధనలను బార్ల నిర్వాహకులు ఏమాత్రం ఖాతరు చేయడం లేదు. ఎక్సైజ్‌ చట్టంలో బార్ల నిర్వహణ వేళలు స్పష్టంగా నిర్థేశించారు. ఉదయం 10గంటల నుంచి రాత్రి 12గంటల వరకు బార్లలో మద్యం అమ్మకాలు జరపాల్సి ఉంటుంది. రాత్రి 10గంటల నుంచి 11గంటల వరకు గంట వ్యవధి ఆహార పదార్థాల కోసం అదనంగా ఇస్తారు. ఇదే మద్యం షాపులైతే ఉదయం 11గంటల నుంచి రాత్రి 9గంటల వరకు, రాత్రి 9గంటల నుంచి రాత్రి 10గంటల వరకు నగదు లావాదేవీలు సరిచూసుకునేందుకు వ్యవధి ఇచ్చారు. మద్యం షాపులతో పోల్చితే బార్లలో 30శాతం వరకు అదనపు రేట్లు వసూలు చేస్తారు. అయితే ఉదయం మద్యం షాపులు తెరిచేందుకు సమయం ఎక్కువగా ఉండటంతో బార్ల నిర్వాహకులు ఈలోగానే పెద్ద ఎత్తున అమ్మకాలు చేసి సొమ్ము చేసుకుంటున్నారు. పైగా రాత్రి 12గంటల తర్వాత బార్ల షట్టర్లు మూసి వెనుక మార్గాల్లో అమ్మకాలు చేపడుతున్నారు. ప్రభుత్వం నిర్థేశించిన సమయాలతో నిమిత్తం లేకుండా వీరు ఇష్టారాజ్యంగా అమ్మకాలు జరుపుతున్నారు

నిర్థేశిత వేళల తర్వాత జరిపే అమ్మకాలపై అదనపు రేట్లు వసూలు చేస్తున్నారనే విమర్శలు వినియోగదారుల నుంచి వినబడుతున్నాయి. వెనుక నుంచి బాహాటంగానే అమ్మకాలు జరుపుతున్నారు. ఇందుకోసం ప్రత్యేక సిబ్బందిని నియమించారు. అదనపు వేళల్లో జరిపే అమ్మకాలతో సిబ్బంది జీతాలు, ఎక్సైజు, పోలీసు తదితర నెలవారీ మామూళ్లు చెల్లించాల్సి ఉంటుందని నిర్వాహకులే చెపుతున్నారు. సాధారణ సమయాల్లో మద్యం షాపులతో పోల్చితే 30శాతం అదనపు రేట్లు ఉన్నాయి. రాత్రి వేళల్లో..అమ్మకపు వేళలు లేని సమయంలో మరో 30శాతం వసూలు చేస్తున్నారు. ఒక విధంగా చెప్పాలంటే మద్యం వ్యసనపరుల జేబులను బార్ల నిర్వాహకులు గుల్ల చేస్తున్నారని చెప్పొచ్చు.